Dagana 23. og 24. febrúar stóð Byggðasafnið í Görðum fyrir fjölþjóðlegu málþingi um varðveislu báta og skipa. Forsaga málsins var sú að á árinu 2015 leitaði bæjarstjóri Akraness eftir ráðgjöf Þjóðminjasafns Íslands um framtíðarvarðveislu kútters Sigurfara. Fenginn var danskur skipasmiður í gegnum Þjóðminjasafnið  til að meta ástand skipsins. Í ljós kom að ástand kútters Sigurfara er afar slæmt og eru flestir viðir þess mikið skemmdir eða ónýtir. Ráðgjöf þjóðminjavarðar var á þá leið að leggja ætti áherslu á að varðveita heimildir um skipið. Minjastofnun lagði fram styrk til undirbúnings verkefnisins og í kjölfarið var verkefnisstjóri ráðinn tímabundið til Byggðasafnsins í Görðum sem vann að skilgreiningu rannsóknaraðferða fyrir skipið, gerð verk- og tímaáætlunar og skipulagði samstarf við þar til bæra aðila um gerð sýningar um kútter Sigurfara.

Á málþinginu fluttu sérfræðingar frá Noregi, Danmörku, Álandseyjum og Íslandi erindi auk þess sem tvær vinnustofur haldnar. Málþingið bar heitið ,,Challenges Facing Historic Ship Conservation: Deconstruction or Reconstructions“ eða ,,Áskoranir við varðveislu báta: taka í sundur eða endurbyggja“. Ljóst er að söfn víða um heim glíma við áskoranir varðandi varðveislu skipa og báta.

Dagskrá fimmtudagsins 23. febrúar fór fram í Tónbergi á Akranesi en dagskrá föstudagsins 24. febrúar á Þjóðminjasafni Íslands í Reykjavík. Erindi á málþinginu voru flutt á ensku en önnur vinnustofan, sem vann með skilgreiningu á gildi kútters Sigurfara fyrir samfélagið á Akranesi, fór fram á íslensku. Ráðstefnan var öllum opin.

Málþingið var að mestu fjármagnað með styrkfé og eru Minjastofnun, A.P. Møller fund í Danmörku og Faxaflóahöfnum færðar kærar þakkir.